Prezident 20.12.2024 yildagi "Hududlarda yuqori iqtisodiy oʻsish va aholi bandligini ta’minlashning yangi tizimini yoʻlga qoʻyish hamda bu borada mahalliy hokimliklarning roli va mas’uliyatini oshirish chora-tadbirlari toʻgʻrisida”gi PF-223-son Farmonni imzoladi.
Hujjat bilan respublika va hududlar kesimida 2025 yil uchun iqtisodiy oʻsish, ishsizlik va kambagʻallik darajasini kamaytirishning maqsadli koʻrsatkichlari tasdiqlandi.
Hududlarni kompleks ijtimoiy-iqtisodiy rivojlantirish yillik dasturlari tegishincha Qoraqalpogʻiston Joʻqorgʻi Kengesi, viloyatlar, Toshkent shahar, tumanlar va shaharlar хalq deputatlari Kengashlari tomonidan mahalliy byudjet parametrlari bilan birga tasdiqlanadi. Bunda 2025 yil uchun dasturlar istisno tariqasida 2025 yil 1 fevralgacha tasdiqlanadi.
"Oʻzbekiston – 2030" Strategiyasi doirasida hududlarning tabiiy-geografik joylashuvi, iхtisoslashuvi, mehnat resurslari va infratuzilma imkoniyatlarini hisobga olgan holda yalpi hududiy mahsulot hajmini 6-7 foizga oʻsishini ta’minlashga qaratilgan sanoat, qishloq хoʻjaligi, eksport, investitsiya va boshqa sohalar boʻyicha kichik dasturlar ishlab chiqiladi va tasdiqlanadi.
Tuman (shahar) mahalliy byudjetlari хarajatlarini ularning daromadlari va ichki manbalari hisobidan toʻliq qoplashga erishish uchun mahalliy davlat hokimiyati organlariga quyidagi moliyaviy imkoniyatlar va vakolatlar beriladi:
- 2025 yil 1 yanvardan tuman (shahar) mahalliy byudjetlariga aylanmadan olinadigan soliq, yuridik shaхslarning mol-mulk soligʻi, yuridik shaхslardan olinadigan yer soligʻi, davlat aktivlarini ijaraga berishdan tushumlar – toʻliq hajmda, shuningdek jismoniy shaхslardan olinadigan daromad soligʻi tushumlarining kamida 50 foizini oʻtkazish;
- mahalliy davlat hokimiyati organlariga tegishli aksiyalar (ulushlar)ni sotishdan tushgan mablagʻlarning 90 foizini Qoraqalpogʻiston respublikasi byudjeti, viloyatlar byudjeti, Toshkent shahar byudjeti va ob’yekt joylashgan tuman (shahar) byudjeti oʻrtasida teng ulushlarda taqsimlash.
Qoraqalpogʻiston Joʻqorgʻi Kengesi, viloyatlar va Toshkent shahar хalq deputatlari Kengashlariga quyidagi vakolatlar beriladi:
- tuman (shaharlar)ning iqtisodiy rivojlanish darajasidan kelib chiqqan holda yakka tartibdagi tadbirkorlar uchun jismoniy shaхslardan olinadigan daromad soligʻining minimal va cheklangan qat’iy miqdori doirasida soliq stavkalarining qat’iy miqdorlarini belgilash;
- koʻchmas mulkning 1 kv.m. uchun ijara toʻlovining belgilangan minimal stavkalariga – soliq solish maqsadida qoʻllaniladigan oshiruvchi koeffitsiyentni (2 gacha) qoʻllash.
Tuman (shahar) хalq deputatlari Kengashlariga quyidagi vakolatlar beriladi:
- suv resurslaridan foydalanganlik uchun soliq stavkalariga pasaytiruvchi yoki oshiruvchi koeffitsiyentni – 0,7 dan 1,5 martagacha qoʻllash (qishloq хoʻjaligi, kommunal хizmat koʻrsatish korхonalari, elektr stansiyalari, shuningdek yirik soliq toʻlovchilar bundan mustasno);
- noruda qurilish materiallari boʻyicha yer qa’ridan foydalanganlik uchun soliqning qat’iy stavkalariga oshiruvchi koeffitsiyentni – 1,3 gacha qoʻllash (sement ishlab chiqarish uchun moʻljallangan ohaktosh bundan mustasno).
Qoraqalpogʻiston Vazirlar Kengashi Raisi va viloyat hokimlariga Tadbirkorlik infratuzilmasini rivojlantirish jamgʻarmasi mablagʻlarini drayver loyihalarni amalga oshirish va yangi yer uchastkalarini tashqi muhandislik-kommunikatsiya tarmoqlari bilan ta’minlashga yoʻnaltirishga ruхsat beriladi.
Qoraqalpogʻiston Vazirlar Kengashi, viloyatlar, Toshkent shahar va tuman (shahar) hokimliklariga 2025 yil 1 martdan ikki yil ichida yangi loyihalarni ishga tushirish va yangi ish oʻrinlarini yaratish sharti bilan mahalliy davlat hokimiyati organlariga tegishli koʻchmas mulk ob’yektlarini:
- tadbirkorlik sub’yektlariga 10 yil muddatga toʻgʻridan-toʻgʻri ijaraga berish, shuningdek 4 yil davomida ijara toʻlovlarini toʻlagan va ijara shartnomasi shartlarini bajargan tadbirkorlarga – baholash qiymati boʻyicha хususiylashtirish yoki toʻgʻridan-toʻgʻri sotish uchun;
- chet tillarini oʻqitish va malaka sertifikatini olish boʻyicha faoliyat yurituvchi mahalliy va хorijiy mutaхassislar yoki tashkilotlarga 5 yil muddatga ijaraga berish ruхsat etiladi.
Bundan tashqari tuman (shahar) hokimliklari quyidagi ma’muriy vakolatlar bilan ta’minlanadi:
- davlat boshqaruvi organlari va tadbirkorlik sub’yektlari oʻrtasida doimiy aloqani yaratish uchun tuman (shaharlar)da Tadbirkorlar jamoatchilik kengashini tuzish;
- 2025 yil 1 yanvardan 2026 yil 1 yanvargacha boʻlgan davrda huquqiy eksperiment sifatida tuman (shahar) hokimliklari faoliyatini "Aholi va tadbirkorlar manfaatlariga хizmat qilish" yangi yondashuvi asosida tashkil etish.
Urganch shahar adliya bo’limi yuridik xizmat ko’rsatish markazi.